الاوراق المطلوبة وطريقة التقديم في الجيش المصري للمجندين من البداية للنهاية 2014

بسم الله الرحمن الرحيم نقدم اليوم لزوار موقعنا الكرام من الشباب في جمهورية مصر العربية والتي يعمل بها نظام التجنيد الاجباري للشباب الاوراق المطلوب تجهيزها للتقديم في الجيش و طرق التقدم وسماع الارجاء و سماع السلاح تابعوا معنا .

• بعد ظهور نتيجة الكلية من الجامعة المتلحق بها الشاب المطلوب للتجنيد عليه احضار الاوراق الاتية :- 
• صورة من المؤهل الجامعي ( المؤهل الدارسي ) (الشهادة المؤقتة).
• فيش و تشبيه جنائي ( من القسم التابع له ) .
• صور شخصية ذات خلفية بيضاء 4 في 6 شرط ان تكون حليق الراس و الذقن عند التصوير . 
• نموذج 6 جند وفي حالة ان كنت دور ثاني احضار نموذج 7 جند .
• فصيلة دم عليها ختم النسر (يمكنك الحصول عليها من اي مستوصف حكومي او مستشفي حكومي) .
• صور من البطاقة الشخصية .
• شهادة ميلاد كمبيوتر (اصل) عليها الرقم الثلاثي (يفضل عند استخراجها استخراج اثنين اخرين اصل).

بعد احضار الاوراق السابقة هتروح يامعلم القسم اللي انت تابع ليه وهتسأل عن مكتب التجنيد بيبقي موجود جوه القسم هتلاقي شباب كتير بتقدم اورقها هتقف في الطابور ممكن يكون طويل و ممكن يكون مافيش حد انت ونصيبك بس الأحسن تروح بدري الساعة 8 تكون في القسم علشان تخلص بدري بدري و تروح بيتكم .

هتقدم الاوراق في مكتب التجنيد الموجود جوه القسم وبعد ماتقدم الاوراق هيختملك عليها بعد ماتاخد الختم هتروح لشيخ الحارة موجود جوه القسم (عند مكتب المأمور) هيختملك او يمضيلك علي عنوانك وبعد كده هترجع تاني لمكتب  التجنيد هياخد منك الورق ويديك ورقة زرقة صغيرة عليها اسمك و مؤهلك الدراسي و هيحدد ليك ميعاد تقديم ورقك و الكشف الطبي في منطقة و تعبئة التجنيد اللي انت تابع ليها .

الخطوة التانية (منطقة التجنيد و التعبئة) :- انا كنت في الهايكستب هتكلم اكتر بشكل مفصل عنها للعلم نفس النظام اللي في الهايكستب موجود في كل مناطق التعبئة مافيش اي اختلاف . 

• قبل ماتروح الهايكستب صور كل الورق اللي هتاخده من القسم 10 نسخ وخدهم كلهم معاك احتياطي وماتكسلش لأنك ممكن ترجع علي ورقة واحدة في ماكينات تصوير جوه لكن هيبقي عدد كبير بيصور وطوابير كتير احسنلك علشان ماتتعبش 
• الهايكستب ممكن تروح له من الجراج عن طريق الميكروباصات هتركب ميكروباص العبور وهتنزل عند الهايكستب هتتمشي شوية و هتركب اتوبيس تابع للقوات المسلحة المصرية هينزلك قدام الهايكستب علي طول هتلاقي طوابير من البشر واقفه مستنية دورها في الدخول .
• هتدخل هتمشي علي خط اخضر وهتلاقي شباك هتدفع فيه جنيه وهتاخد منه ورقة صفره (نموذج 6 او 7 جند) بالاضافة الي كتاب دليل شب التجنيد .
• هتقعد في الاستراحة و هيجي صف ضابط او ممكن عساكر من المجندين هتساعدك في ترتيب الورق بعد ترتيب .
• بعد ترتيب الورق هتدخل مبني هتقعد فيه هيرجعو فيه ورقك وهما بيرجعو الورق بتاعك بتتصور بالبدلة العسكرية وبيقاس وزنك و طولك بعد كده بتخرج وبتاخد كارت متابعة الكشف الطبي .
ب
• بعد ما بتاخد كارت متابعة الكشف الطبي بتمشي علي خط اصفر طويل لحد مابتدخل مبني الكشف الطبي هتلاقي ناس كتيرة قلعة (مولد سيدي العريان ^_^) اقلع زيهم وماتكسفش كلنا بنقلع 
• هتقف في طابور ومعاك كارت المتابعة بتاع الكشف الطبي لو عندك اي مشكلة او مرض بتقولها للدكتور وبيكشف عليك بدقة لو ليك نصيب ممكن تخرج ^_^ لو عندك فعلا مرض ماتكسفش وقول المعاملة في الهايكستب بصراحة كويسة جداً . 
• من هنا تقدر تتابع الكشف الطبي للمجندين 2014 في مصر اضغط واعرف الكشف الطبي بالتفاصيل .
•  لو عندك مشكلة او مرض و اخذت فيه لائق ممكن تعمل تظلم وبتتعرض علي لجنة كشف طبي عليا بتكون موجودة في حلمية الزيتون اللي عند مبني التجنيد اللي هناك . 

الخطو الثالثة (سماع الارجاء) :- 

• بعد انتهائك من الكشف الطبي اذا كنت لائق طبياً بيتحددلك يوم الارجاء و يوم الارجاء ده هتعرف منه هتدخل الجيش ولا هتاخد تأجيل هتدخل هتقعد في منصة كبيرة روح متأخر شويه يعني علي الساعة 10 كون هناك علشان هما بيتأخرو شوية لحد مايوصلهم الفاكس هيجي العميد ويقول الدفعة هتدخل ولا هتاخد تأجيل . 

الخطوة الرابعة (مناظرة طبية) :-

• بعد سماع الارجاء لو الدفعة هتدخل الجيش بيتم عمل مناظرة طبية بتدخل غرفة كبيرة ومعاك زميلك المجندين مع اكتر من دكتور لو بتشتكي من حاجة او حصلتلك حاجة بعد الكشف الطبي بتقولها وبيكشفوا تاني عليك من جديد .

الخطوة الخامسة (سماع السلاح واماكن الترحيل) :-

• بعد المناظرة الطبية مبروك عليك كده انت بقيت فرد من افراد القوات المسلحة المصرية ^_^ هتروح هتقعد في نفس المنصة بتاعت سماع الارجاء وهيجي صف ضابط بالميكرفون هينادي علي سلاح كل واحد وهيبتدي بالاسلحة اللي العدد هيكون فيها قليل وهكذا .
• بعد ماعرفت سلاحك اللي انت فيه هيتقلك مكان ترحيلك مكان الترحيل بيختلف من سلاح للتاني في ناس ممكن تترحل من الهايكستب و ناس ممكن تترحل من مكتب تعبئة وتجنيد الجيزة وهكذا علي حسب السلاح . 

الخطوة السادسة (مركز التدريب و الخدمة) :-

• مراكز التدريب بيتحدد علي حسب السلاح يعني المشاه اغلبهم بيروحوا مركز تدريب رقم 2 مشترك المشاه في المعادي وكمان سلاح اجهزة القيادة بيروح نفس المركز . 
• اما لو كنت في سلاح القوات الجوية هتروح مركز تدريب كسفريت الموجود في الاسماعيلية بفايد .
• اما لو كنت سلاح دفاع جوي هتروح مركز تدريب دهشور 
• وهكذا

انتهي الموضوع لو في اي استفسار او معلومة  انا في الخدمة وهساعد الكل زميلك لسه في فترة التجنيد ^_^